HATAW! D'yaryo ng Bayan hatawtabloid.com
NAKOMPISKA ng mga awtoridad ang higit sa p7-milyong halaga ng pinaniniwalaang ecstasy na nakapaloob sa dalawang parsela sa Port of Clark, lalawigan ng Pampanga.
Ayon sa ulat mula sa Bureau of Customs (BoC), nagmula ang kargamento, unang idineklara bilang car mats, sa bansang Austria at patungong Lungsod ng Davao sa ilalim ng parehong consignee.
Ngunit sa isang pisikal na pagsusuri sa kargamento ay nakakompiska ng kabuuang 4,124 tableta ng hinihinalang ecstasy na tinatayang may kabuuang halagang P7,040,125.
Ayon sa mga tauhan ng Customs, isinagawa ang inspeksiyon matapos ma-flag ng X-ray team ng BoC ang mga parsela para sa mga kahina-hinalang imahen.
Sa pagsusuri, ang unang parsela ay natagpuang naglalaman ng 2,693 tableta ng ecstasy na tinatayang may halagang P4,591,275, habang ang pangalawa ay nakakompiska ng 1,431 tableta ng ecstasy na may halagang P2,448,850.
Nagpositibo sa ilegal na droga ang mga nakompiskang tableta sa inisyal na on-site presumptive drug test ngunit ang mga sample nito ay isinumite sa PDEA para sa confirmatory laboratory examination.
Habang hinihintay ang beripikasyon, sinabi ng BoC na maglalabas ito ng warrant of seizure and detention para sa mga parsela dahil sa paglabag sa Customs Modernization and Tariff Act. (MICKA BAUTISTA)
