HATAW! D'yaryo ng Bayan hatawtabloid.com
Nasakote ang dalawang matandang babaeng pinaniniwalaang sangkot sa bultong pamamahagi ng shabu matapos ang matagumpay na buybust operation sa loob ng isang fast food chain sa Brgy. Borol 1st, Balagtas, Bulacan, nitong Lunes, 28 Hulyo.
Kinilala ng hepe ng Philippine Drug Enforcement Agency (PDEA) Bulacan ang mga naarestong suspek na sina alyas Rosa, 44 anyos, at alyas Tere, 65 anyos.
Nakuha mula sa mga suspek ang tatlong sachet ng hinihinalang shabi na may timbang na 150 gramo at marked money na ginamit ng undercover PDEA agent.
Ayon sa PDEA, ang mga naarestong suspek ay nakatala bilang high-value target (HVTs) at nasa ilalim ng surveillance mula pa noong unang linggo ng buwang ito.
Ang mga narekober na ipinagbabawal na gamot ay ipapasa sa PDEA RO3 laboratory para sa qualitative at quantitative examinations.
Ang sting operation ay isinagawa ng mga operatiba sa pangunguna ng PDEA Bulacan Provincial Office, Bulacan PPO-Provincial Intelligence Unit (PIU), at Balagtas MPS.
Inihahanda na ang mga kasong paglabag sa section 5 (sale of dangerous drugs) kaugnay ng section 26B (conspiracy to sell drugs) sa ilalim ng RA 9165 o Comprehensive Dangerous Drugs Act of 2002 na isasampa laban sa mga suspek. (MICKA BAUTISTA)
