HATAW! D'yaryo ng Bayan hatawtabloid.com
NANAWAGAN ang Chairman Emeritus ng apat na Filipinism advocacy groups sa kagawaran ng Department of Justice (DOJ) at sa Department of the Interior and Local Government ( DILG) na magsagawa ng malalalimang imbestigasyon at alamin kung sino ang mga taong nasa likod ng nagpakalat ng mga maling impormasyon laban kay First Lady Liza Araneta Marcos.
Sa pahayag ni Dr. Jose Antonio Ejercito Goitia, Chairman Emeritus ng People Alliance for Democracy and Reform (PADER), Alyansa ng Bayan para sa Kapayapaan at Demokrasya (ABKD), Liga Indipendencia Pilipinas (LIPI) at Filipinos Do Not Yield (FDNY- Movement), ang kanyang panawagan ay bunsod sa isang pekeng police blotter na lumabas online, kaugnay ng pagkamatay ni Paolo Tantoco.
“Bilang isang taong nakasaksi sa kanyang totoong dedikasyon sa bansa at sa kanyang hindi natitinag na malasakit sa kabila ng samot-saring pang-iinsulto at panggigipit, labis akong nabalisa kaya napilitang magsalita,” ani Goitia.
Aniya, ang nasabing blotter na kumalat ay pinabulaanan na umano ng Konsulado ng Filipinas sa Los Angeles at maging ng Malacañang.
“Wala ito sa mga opisyal na pagkakakilanlan o tanda ng isang tunay na dokumento mula sa Estados Unidos. Ito ay gawa-gawa lamang na idinisenyo upang iligaw ang publiko,” ani Goitia patungkol sa nasabing police blotter.
“Tama, nasa Estados Unidos siya noon pero wala siyang kinalaman sa pagpanaw ni Paolo Tantoco. Pawang kasinungalinan lamang na ginagamit upang magdulot ng galit at pagkalito,” dagdag ni Goitia.
Mananagot umano ang mga nasa likod ng smear job na ito hindi lang legal, kundi sa mata ng mga taong nagmamalasakit umano sa katotohanan.
Giit ni Goitia, may mga batas na nakatakda upang harapin ang malisyosong pag-uugali. Isa sa mga kasong posibleng isampa sa responsable sa pagpapakalat ng maling impormasyon ay Cyber Libel sa ilalim ng Cybercrime (RA 10175) para panagutin ang mga tao sa online na paninirang-puri, Falsification of Public Documents (Article 171 Revised Penal Code), at Safe Spaces Act (RA 11313) na nagpoprotekta sa kababaihan, kabilang ang mga naglilingkod sa bayan.
Aniya, makatutulong ang international cooperation na kinasasangkutan ng mga ahensiya tulad ng Beverly Hills Police Department at Embahada ng Estados Unidos na masubaybayan kung sino ang gumawa at nagkalat ng pekeng blotter.
Nanawagan si Goitia sa mga Filipino na huwag madaljng magpaloko. Aniya, mag-isip at maging mapanuri, magtanong, at huwag hayaang hubugin ng kasinungalingan ang ating pang-unawa.
Nagpahayag ng suporta si Goitia sa Unang Ginang.
“At kay First Lady Liza Araneta Marcos, hindi ka nag-iisa. Nakikita ng marami sa amin ang ginagawa mo at ang biyayang haharapin mo sa kabila ng lahat ng ingay na yumuyurak sa iyong pagkatao. Tumayo kami at patuloy na tatayo kasama mo,” ani Goitia. (BONG SON)
