HATAW! D'yaryo ng Bayan hatawtabloid.com
NASAKOTE ng Caloocan City Police ang inireklamong dalawang snatcher na nanghablot ng cellphone makaraang sumemplang ang sinasakyang motorsiklo nang habulin ng mga pulis sa isinagawang follow-up operation, Sabado ng umaga sa Caloocan City.
Ayon kay Caloocan police chief P/Col. Joey Goforth, nagpapatrolya ang kanyang mga tauhan sa East Grace Park nang marinig ang paghingi ng tulong ng 23-anyos babae nang hablutin ng riding-in-tandem ang kanyang hawak na cellphone.
Agad hinabol ng mga pulis na nakatalaga sa Police Sub-Station 2 ang mga suspek at sa pagmamadaling tumakas ay nasagi ang isang sasakyan sa 9th Avenue, 2nd Street, Brgy. 106, dahilan para mawalan ng kontrol sa manibela at sumemplang na nagresulta sa pagkakadakip sa kanila.
Nabawi ng mga pulis mula sa dalawang suspek, edad na 32 at 23 anyos, ang cellphone ng biktima na nagkakahalaga ng P7,000 habang kinompiska rin ang gamit na motorsiklo sa paggawa ng krimen.
Kasalukuyang nakakulong ang dalawang suspek at sasampahan ng kasong robbery snatching sa Caloocan City Prosecutor’s Office. (VICK AQUINO)
