Drug den sa NE nilansag, 5 tulak timbog

ARESTADO ang limang indibiduwal sa loob ng isang makeshift drug den habang nasamsam ang tinatayang P88,400 halaga ng hinihinalang shabu kasunod ng ikinasang buybust operation ng mga awtoridad sa Barangay Talipapa, Cabanatuan, lalawigan ng Nueva Ecija, nitong Martes, 29 Abril.

Kinilala ng PDEA Nueva Ecija Provincial Officer ang mga suspek na sina alyas ​​San, 49 anyos; alyas Dict, 28 anyos; alyas Del, 29 anyos; alyas Son, 32 anyos; at alyas Ton, 34 anyos.

Nakuha sa operasyon ang tinatayang 13 gramo ng hinihinalang shabu, tinatayang nagkakahalaga ng P88,400; samot-saring drug paraphernalia; at buybust money.

Magkatuwang na isinagawa ang operasyon ng Philippine Drug Enforcement Agency (PDEA) Nueva Ecija Provincial Office, PDEA RO3 Special Enforcement Team, at PNP Special Action Force.

Dadalhin ang mga nakompiskang ebidensiya sa PDEA RO3 laboratory para sa forensic examination habang sasampahan ng kasong paglabag sa RA 9165 o Comprehensive Dangerous Drugs Act of 2002 ang mga naarestong suspek. (MICKA BAUTISTA)