Naimbentong C-trike ng CSU, iniaalok sa FETODA ng Tuguegarao para sa environment-friendly na transportasyon sa lungsod

NAKAHANDA ang Electromobility Research and Development Center o EMRDC ng Cagayan State University na ibahagi ang kanilang teknolohiya sa pag-convert ng mga tradisyonal na tricycle tungo sa pagiging de-kuryente, sa sandaling handa na rin ang tricycle sector sa Tuguegarao City at iba pang lugar sa rehyon, na tangkilikin ito.

Sinabi ni Campus Research Coordinator Michael Orpilla na mayroon na silang inisyal na pag-uusap sa Federation of Tricycle Operators and Drivers and Association o FETODA ng Tuguegarao City, at hinihintay na lamang umano ng grupo ang isang ordinansa hinggil sa regulasyon sa converted tricycles.

Mahigit pitong libo ang tricyle sa lunsod na mayroong prangkisa, bukod pa sa ilang libong kolorum, na kung hindi man 2-stroke ay 4-stroke engine ang ginagamit, na parehong nagbubuga ng polusyon.

Sa converted tricy o C-trike ng CSU, tatanggalin na ang mechanical engine nito upang ma-convert sa kuryente, kung kaya’t hindi na magbubuga ng usok ang tricycle, na malaking tulong sa ating kapaligiran.

Batay sa kanilang komputasyon, sinabi ni Orpilla na sa bawat kilometrong tinatakbo ng isang 2-stroke engine, pumapatak sa 3.2 pesos ang nagagastos ng driver; habang sa 4-stroke engine naman ay 2.3 pesos per kilometer…habang kung C-trike na, umaabot lamang ito sa .88 pesos per kilometer.

Ibig sabihin ay mas malaki ang matitipid ng mga tricyle driver at malaki rin ang kitang maiuuwi nila sa kanilang pamilya kung converted trike na ang kanilang gamit.

Ang C-trike project ay kabilang sa mga proyektong pinopondohan ng DOST sa CSU, bilang kontribusyon ng unibersidad sa mga hakbanging mapigilan ang malalang epekto ng climate change sa mundo.

Kung magpapalit sa C-trike at sa electric tricycle ang mga tao, ay posibleng makamit ang hangarin ng mundo na maibaba sa 75% ang carbon emission ng nasa transport sector pagsapit ng taong 2030. (RADYO PILIPINAS TUGUEGARAO)