HATAW! D'yaryo ng Bayan hatawtabloid.com
PUSH NA’YAN
ni Ambet Nabus
ISA pang politiko ang nakaharap namin kamakailan.
Ang kontrobersiyal na abogado noon ni Benhur Luy (remember the P10-B pork barrel scam ni Janet Napoles?) na si Atty. Levi Baligod na dating tumakbo sa pagka-senador noong 2016.
Gaya ng ibang mga magagaling at matatalinong abogado, may opinyon din si Atty Levi sa kasalukuyang sitwasyon ni dating Pangulong Duterte sa ICC sa The Hague, Netherlands.
Pero more than that, naibahagi niyang sa kanyang pagtakbo bilang Congressman sa isang distrito sa Leyte ay mas nais niyang tutukan ang mga usaping ekonomiya sa lugar.
Sobrang relatable ‘yung kuwento niya hinggil sa mga pamilya sa ilang lugar sa Leyte na kumakain ng isang uri ng root crop na may lason at kapag hindi maayos ang pagproseso nito bago kainin ay tiyak na kamatayan ang ending.
“Tinatyaga talaga nilang hiwain ng maninipis ‘yung mala-kamote na root crop then ilalagay sa sako at magdamag na ibababad sa running water (ilog o sapa) para matanggal ang lason, bago nila lulutuin at kakainin,” kuwento ng abogadong tumatakbong kongresista ng distrito 5 ng Leyte.
Kung papalarin ay nais niyang gumawa ng mga batas na mas lalong magpapatibay ng interes ng mga magsasaka (both farmers and fishermen) na dapat may proteksiyon ng gobyerno.
Nang i-segue namin ang tanong kung ano naman ang reaksiyon niya sa showbiz personalities na dumarami ang bilang sa iba’t ibang posisyon sa gobyerno, sey nito, “lahat naman ay qualified as per the law ay may karapatang pasukin ang politika.
“Pero dapat din nilang itanong sa kanilang sarili kung ang kakayahan ba nila ay nararapat sa mga usaping pampolitika at ‘yung mga sektor ba na nais nilang i-represent ay nauunawaan talaga nila ang mga pangangailangan?,” susog pa nito.
Although inaamin niyang nakakalamang ang mga kilalang celebrities pagdating sa madaling makahimok ng mga tao, “nasa tao talaga kung paano nilang higit na dapat kilalanin ang gustong manilbihan.”
Sa mga naging karanasan ni Atty Levi bilang abogado ng mga whistleblower at may isyu sa gobyerno, if ever daw na may magpu-produce ng movie tungkol sa kanya, wish niyang sina Dawn Zulueta at Richard Gomez ang gumanap hindi lang dahil big fan siya ng love team nina Goma at Dawn, kundi ganoo daw ang feeling nila ng minamahal niyang asawa na tumatakbo namang mayor sa Baybay City, Malot Baligod.
