HATAW! D'yaryo ng Bayan hatawtabloid.com
ni NIÑO ACLAN
NANINIWALA si dating presidential adviser, Salvador Panelo na ‘maliit ang tingin’ ng mga mambabatas kay dating Pangulo Rodrigo Duterte mula nang mawala sa puwesto kaya pinayohan niya na tumakbong senador sa 2025 elections.
Tahasangsinabi ni dating Presidential Spokesperson Salvador Panelo sa kanyang pagdalo sa media forum na The Agenda sa Club Filipino, hindi lamang layunin ng Quad Committee hearing sa mababang kapulungan ng kongreso na wasakin ang kaalyado ng dating pangulo na pawang mga re-electionist senators kundi mismong ang dating pangulo.
Naniniwala si Panelo, hindi lamang ang dating pangulo ang target ng mga pagdinig kundi maging ang anak nitong si Vice President Sara Duterte.
Iginiit ni Panelo, hindi siya magtataka na isang araw ay may gumugulong nang impeachment case laban sa kasalukuyang vice president. Ngunit aniya malabong magtagumpay ang balaking ito dahil walang sapat na ebidensiya laban dito.
Ipinunto ni Panelo, sa nagaganap na pagdinig, pilit iniuugnay ang dating pangulo sa ilang mga pangyayari dahil lubhang ‘maliit ang tingin’ sa kanya ng mga mambabatas simula nang mawala siya sa puwesto.
Dahil dito, pinayohan ni Panelo ang dating pangulo na tumakbo bilang senador dahil segurado umano ang panalo.
Naniniwala si Panelo, sa sandaling manalo ang dating pangulo, tiyak na magkakaroon siya ng proteksiyon at magbibigay galang ang lahat sa kanya.
Gayonman, sinabi ni dating PRRD sa Davao City na hindi na kaya ng kanyang katawan ang mangampanya sa buong bansa. Magko-collapse umano ang kanyang katawan kapag ginawa niya iyon.
Kaugnay nito, naniniwala si dating presidential adviser at political analyst Ronald Llamas na ang susunod na halalan ang magiging political landscape ng bansa.
Itinuturing ni Llamas, ang lahat nang nagaganap ay maituturing na ‘existential strategies’ lalo na’t nagdudurugan ang kampo nina Marcos at Duterte na magkaalyado noong 2022 presidential at vice presidential election.
