HATAW! D'yaryo ng Bayan hatawtabloid.com
INIHAHANDA ng pamahalaang lungsod ng Maynila ay ang distribusyon ng allowances ng mga senior citizens para sa buwan ng Setyembre hanggang Disyembre ngayong taon.
Nabatid na inatasan ni Mayor Honey Lacuna ang Office for Senior Citizens Affairs (OSCA) sa pamumuno ni Elinor Jacinto at ang public employment service sa ilalim ni Fernan Bermejo na magsagawa ng consultative meetings para sa nasabing bagay.
Ang mga hiniling na dumalo sa pulong konsultasyon ay ang mga opisyal ng 896 barangays sa anim na distrito ng Maynila.
Layunin ng nasabing pagpupulong ayon kay Lacuna, ay upang tiyakin na maayos at mabilis ang distribusyon ng mga payrolls na inihahanda ng pamahalaang lungsod para sa allowances ng senior citizens.
Sakop ng nasabing payrolls ang mga buwan ng Setyembre, Oktubre, Nobyembre, at Disyembre ng taong kasalukuyan.
Nanawagan ang lady mayor ng suporta sa lahat ng barangay officials na may kinalaman na maging present sa petsa, araw, at oras ng consultative meetings.
Ang mga inaasahang dadalo ay ang barangay chairpersons, barangay secretaries o kahit na sinong awtorisadong mag-organisa o gumawa ng updated senior master lists sa kanilang mga nasasakupan.
Sa ilalim ng city government’s social amelioration program, ang bawat isa sa 203,000 senior citizens ay tumanggap ng P2,000 cash assistance na kumakatawan sa P500 buwanang allowance para sa apat na buwan.
Ang 2nd payout na sakop ang mga buwan ng Mayo hanggang Agosto 2024 ay nagsimula na ngayong buwan at inaasahang matatapos hanggang 27 Setyembre 2024. Ang payouts ay hinati sa dalawang district kada specific dates.
Ang payout, cashout at liquidation ng senior citizens’ allowance ay sa ilalim ng tanggapan ni Bermejo.
Sinabi ni Lacuna, ang senior allowances, ay ibinibigay bilang bahagi ng local government’s social amelioration program at idinaraan na ngayon sa mga barangay dahil sa kahilingan ng mga senior citizens na nagkakaproblema sa paggamit ng PayMaya.
Nanawagan sina Lacuna at Jacinto sa mga senior citizens na i-surrender na ang kanilang PayMaya cards na mapapaso ngayong buwan para mapalitan ng OSCA IDs na walang expiration at kanilang magagamit sa pagkuha ng kanilang monthly allowance. (BONG SON)
