HATAW! D'yaryo ng Bayan hatawtabloid.com
SUNOD-SUNOD na nasakote ang tatlong hinihinalang tulak ng ilegal na droga, anim na wanted, at isang pinaniniwalaang karnaper sa iba’t ibang police operations na isinagawa ng mga tauhan ng Bulacan Police Provincial Office (PPO) hanggang nitong Linggo ng umaga, 25 Agosto.
Batay sa ulat na ipinadala kay P/Col. Satur Ediong, OIC ng Bulacan PPO, nakasaad na ikinasa ang magkahiwalay na anti-illegal drug operations ng Station Drug Enforcement Unit (SDEU) ng Hagonoy at Angat MPS na ikinadakip ng tatlong personalidad sa droga.
Nakompiska sa operasyon ang kabuuang tatlong sachet ng hinihinalang shabu, tatlong sachet ng hinihinalang marijuana, drug paraphernalia, at buybust money.
Gayondin, naaresto ang anim na indibiduwal na wanted ng batas sa iba’t ibang manhunt operations na inilatag ng tracker teams ng San Jose Del Monte, Meycauayan, Plaridel, at San Ildefonso C/MPS at CIDG.
Dinakip ang mga suspek para sa kasong paglabag sa BP 6 o Illegal Possession of Bladed Weapon, RA 9165 o Comprehensive Dangerous Drug Act of 2002 , Qualified Theft, Acts of Lasciviousness, at Attempted Murder.
Samantala, nakorner ang isang 28-anyos lalaki ng mga operatiba ng San Jose Del Monte CPS dahil sa kasong paglabag sa RA 10883 o Anti-Carnapping Law na naganap sa Brgy. Gaya-Gaya, lungsod ng San Jose del Monte, dakong 12:30 am nitong Sabado.
Inihahanda ang mga kasong isasampa sa korte laban sa mga naarestong suspek na kasalukuyang nasa kustodiya ng kani-kanilang arresting stations. (MICKA BAUTISTA)
