Notoryus na magnanakaw/akyat bahay sa Navotas huli sa akto!

TIMBOG ng mga operatiba ni Navotas City Police chief P/Col Mario Cortes ang isang 25-anyos kilabot na magnanakaw na si alyas Alvin, porter sa Malabon fish port at residente sa Longos Malabon City. Makaraang maaktuhang nilalagare ang kandado ng isang establisyemento kamakawala ng gabi sa Navotas City.

Nasakote ang suspek sa pinalakas na pagpapatrolya at agarang pagresponde sa tawag  ng komunidad patungkol sa nasabing krimen.

Nakumpiska ng Intelligence Section na pinangunahan ni PCapt Luis Rufo sa suspek na si alvin ang isang improvised firearm(sumpak), dalawang 12-guage ammo, lagare, martilyo, vice crip, wire cutter, cellphone at isang realme tablet.

Nabatid na ang hindi pinangalanang tindahan ay dati nang nilooban ng suspek noong July 2024 kung saan tinangay ang ilang pera at gadgets kabilang ang realme tablet na nabawi sa suspek nang bumalik at magtangkang pasukin muli ang tindahan.

Ang nasabing suspek ay matagal nang subject ng intensified police patrolling, spotting and manhunt operation ng Navotas PNP.

Nabatid pa sa pulisya na ang suspek rin ay sangkot sa ilang nakawan sa area tulad ng panloloob sa isang malaki ng establisyemento kung saan hindi bababa sa P20k cash at iba pang mahahalagang gamit ang natangay noong nakaraang taon sa nasabing lungsod. (BRIAN BILASANO)