Sa Bataan
LOLONG TULAK, 2 GALAMAY TIKLO SA BUYBUST

NADAKIP ang isang senior citizen na sangkot sa ilegal na droga at dalawa niyang kasabwat sa lugar na  pinaniniwalaang drug den sa ikinasang buybust operation sa Brgy. Tipo, bayan ng Hermosa, lalawigan ng Bataan, nitong Sabado, 13 Hulyo.

Kinilala ng team leader ng Philippine Drug Enforcement Agency (PDEA) ang mga naarestong suspek na sina Racquel Crespo, 69 anyos; Angelo Corpin, 32 anyos; at Ariel Acedera, 25 anyos, pawang mga residente sa nabanggit na barangay.

Nakompiska sa mga arestadong suspek ang kabuuang limang plastic sachet na naglalaman ng 15 gramo ng hinihinalang shabu at tinatayang nagkakahalaga ng P102,000, sari-saring drug paraphernalia, at buybust money.

Isinagawa ang operasyon ng pinagsamang mga elemento ng PDEA Tarlac, Bataan Provincial Offices, PDEA RSET, at Hermosa MPS.

Nakatakdang sampahan ng kasong paglabag sa RA 9165 o Comprehensive Dangerous Act of 2002 ang mga naarestong suspek. (MICKA BAUTISTA)