HATAW! D'yaryo ng Bayan hatawtabloid.com
IPINADALA ni Pangulong Ferdinand Marcos, Jr., sa pamamagitan ni First Lady Liza Araneta-Marcos ang 21 Mobile Primary Clinics sa 21 lalawigan sa Gitna at Hilagang Luzon.
Naunang ipinagkaloob ang tig-iisang unit nito sa pitong mga lalawigan ng Gitnang Luzon na tinanggap ni Gob. Daniel Fernando ang para sa Bulacan mula sa Unang Ginang.
Kasabay nito ang mga Mobile Primary Clinics para sa Pampanga, Bataan, Zambales, Tarlac, Nueva Ecija, at Aurora.
Ipinahayag ng gobernador na akmang-akmang ang pagkakaloob ng mga unit na ito upang lalong mapaigting ang paghahatid ng serbisyong medikal sa mga sitio ng 572 barangay sa Bulacan.
Sinundan ito ng 14 pang Mobile Primary Clinics na tig-iisang natanggap ng mga lalawigan ng Ilocos Norte, Ilocos Sur, La Union, Pangasinan, Apayao, Kalinga, Abra, Ifugao, Mountain Province, Benguet, Batanes, Cagayan, Isabela, at Quirino.
Isa itong Japanese-brand na Toyota Coaster 2024 model na isinailalim sa reconfiguration upang makapagsagawa ng laboratory examinations, doctor consultations, at makapagkaloob ng libreng gamot sa mga pasyente.
Mayroon itong mga kasangkapan gaya ng modern diagnostic equipment, mobile digital X-ray machine, ultrasound machine, hematology analyzer para sa blood tests, binocular microscope, ophthalmoscope para sa eye tests, lab-grade refrigerator, at telemedicine.
Bahagi ito ng 83 Mobile Primary Clinics na ipinamamahagi ng Department of Health (DOH) sa bawat lalawigan na pinondohan ng Office of the President sa halagang P10 milyon ang bawat isa.
Para kay Batanes Governor Marilou Cayco, iikot ang natanggap na Mobile Primary Clinics sa Basco, Mahatao, Ibana, at Uyugan na ibabase sa mga paaralan at mga munisipyo.
Aniya, malaking bagay ito upang mas maabot ang mga Filipino na naninirahan sa dulong hilaga ng bansa.
Samantala, sinabi ni DOH Secretary Teodoro Herbosa, ang Mobile Primary Clinics ay inspirasyon ng Unang Ginang mula sa kanyang proyekto na Lab For All, na mas inilalapit sa pinakakaraniwang tao sa iba’t ibang panig ng bansa ang mataas na kalidad ng serbisyong pangkalusugan. (MICKA BAUTISTA)
