HATAW! D'yaryo ng Bayan hatawtabloid.com
Arestado ng Bulacan PNP ang tatlong nangangalakal ng droga at isang pugante sa isinagawang anti-crime drive sa lalawigan hanggang kahapon ng umaga.
Sa ikinasang drug-sting operation ng Station Drug Enforcement Unit ng Meycauayan CPS at Balagtas MPS ay nagresulta sa matagumpay na pagkakaaresto sa tatlong tulak ng iligal na droga.
Nakumpiska sa mga naarestong suspek ang walong piraso ng heat-sealed transparent plastic sachet na naglalaman ng puting crystalline substance na pinaniniwalaang shabu at buy-bust money.
Dinala sa Bulacan Provincial Forensic Unit ang mga nakumpiskang ebidensya para sa kaukulang pagsusuri, habang ang kaukulang reklamong kriminal para sa mga paglabag sa R.A. 9165 laban sa mga suspek ay inihahanda na para sa pagsasampa sa korte.
Samantala, isang 29-anyos na pugante ang inaresto ng tracker team ng Meycauayan CPS dahil sa krimeng paglabag sa section 14 ng R.A. 9165 at ito ay kasalukuyang nasa kustodiya ng arresting station para sa kaukulang disposisyon.
Ayon kay PColonel Relly B. Arnedo, provincial director ng Bulacan PPO, patuloy ang kapulisan sa lalawigan sa walang patid na opensiba laban sa ilegal na droga at walang humpay na pagtugis sa mga lumalabag sa batas. (MICKA BAUTISTA)
