GRO ‘pinapak’ ng 2 kaibigan  sa KTV bar

IPINADAKIP ng 26-anyos guest relation officer (GRO) ang kaniyang ‘dalawang kaibigan’ matapos siyang pagsamantalahan sa gitna ng kalasingan sa isang silid ng KTV bar sa Quezon City nitong Martes ng madaling araw.

Kinilala ang mga suspek sa alyas na Dodong, at  ang isa pa ay alyas Jay–R, kapwa 31 anyos, parehong tricycle driver, nakatira sa Brgy. Socorro, Cubao, Quezon City.

Sa report ng Quezon City Police District (QCPD), Cubao Police Station 7, bandang 5:30 am nitong Martes, 23 Abril, nang mangyari ang insidente sa loob ng Paro Paro G KTV Bar, matatagpuan sa No. 18 Liberty Ave., Brgy. Socorro Cubao.

Batay sa imbestigasyon ni P/SSgt. Madilyn Habawel ng Women and Children’s Protection Desk, bandang 2:44 am ay nakipag-inuman ang biktima na, kinilala sa alyas na Elena, 26, single mother, at isang guest relation officer (GRO), sa mga kaibigan, kabilang ang mga suspek sa nasabing KTV bar.

Nang malasing ay nagpaalam ang biktima na matutulog muna pero nang magising  ay wala nang saplot ang kalahati niyang katawan at nakita niya si Dodong na hinihipo at nilalaro ang sarili at binibigkas ang “Sam, si Dodong ‘to.”

Napabalikwas ang biktima at sinampal ang suspek saka sinabing “Dong ayoko umalis ka na! ‘Wag po.”

Pero iginiit ng suspek ang kanyang sarili at maging ang daliri ay ipinasok sa kaselanan ng biktima na noon ay hindi nakagulapay dahil sa kalasingan.

Nang mairaos ni Dodong ang matindi niyang pagnanasa ay saka nito iniwan ang biktima na nawalan na ng malay dahil sa kalasingan.

Bandang 8:00 am ng kaparehong petsa, nagising ang biktima at  nakitang hinahaplos-haplos naman ng isa pang suspek na si Jay-R ang maselang bahagi ng kaniyang katawan.

Nanlaban ang biktima at binalaan si Jay-R na  isusumbong sa pulisya dahilan upang tumigil ang suspek at lumabas ng KTV room.

Agad nagsumbong ang  biktima sa pulisya at inaresto ang mga suspek. (ALMAR DANGUILAN)