PSAA lalarga sa Marso 3 sa Ynares Arena

BAGONG liga, bagong pag-asa sa kasanayan ng mga estudyanteng atleta.

Ibilang ang Philippine School Athletic Association (PSAA) sa school-based basketball league na gagabay at magbubukas ng oportunidad sa Kabataang Pinoy na maabot ang pangarap na makasama sa Philippine Team at makalaro sa professional league sa hinaharap.

Ayon kay PSAA founder at commissioner Fernando Arimado bukas ang liga sa lahat ng ekwelahan na nagnanais na mapataas ang kalidad ng programa sa sports at mabigyan nang pagkakataon ang kanilang mga estudyante na makalaro sa dekalidad at organisadong liga.

“Matagal na po tayong organizer sa basketball league. Yung passion natin sa sports yun ang motivation factor kaya nagpursige kaming mabuo itong PSAA. Maraming eskwelahan ang hindi makalaro sa malalaking torneo tulad ng UAAP at NCAA, kaya naman marami ring talented players ang hindi nabibigyan ng pagkakataon. Kaya dito sa PSAA, magagawa nilang ma-expose ang kanilang kakayahan,” pahayag ni Arimado sa Tabloids Organization in Philippine Sports, Inc. (TOPS) ‘Usapang Sports’ nitong Huwebes sa PSC Conference Room sa Rizal Memorial Sports Complex (RMSC) sa Malate, Manila.

“Ang PSAA po ang rehistrado sa SEC (Securities and Exchange Commission) kaya makasisiguro ang ating mga teams na legit poi ang organisasyon natin,” sambit ni Arimado sa lingguhang sports forum na itinataguyod ng Philippine Sports Commission.

Aniya, mahigit 20 eskwelahan ang nagpahayag ng kagustuhan na maging founding member ng liga, ngunit sa kasalukuyan, tanging ang Xavier School, Marist Academy, St. Claire, Our Lady of Lourdes, La Salle-Zobel at San Beda ang halos siguradong kabilang sa liga na nakatakdang magsimula sa Marso 3.

“Mas maraming teams mas Maganda, but eight to 12 teams ang ideal participants natin para matapos natin ang liga within two to three months,” aniya.

Ang grupo ng NAMBRO ang napili ng PSAA na humawak sa technical management at officiating.

Iginiit naman ni Arnel Mindanao, ang marketing director  ng liga, na mabigat na responsibilidad ang mag-organisa ng isang torneo bunsod ng pangangailangang ng malaking kapital, manpower at aspeto sa logistics.

“Nakakatuwa lang na marami pa rin tayong mga kaibigan na tulad natin ay may passion sa sports particular sa basketball. Magandang opportunity na matulungan ang ating mga Kabataan na makapaglaro sila sa isang organisading liga, at mabigyan sila ng karampatang exposure para maipakita nila ang kanilang mga talento,” sambit ni Mindanao na kapwa varsity member ang dalawang anak sa volleyball at basketball sa La Salle.

Nakuha ni Mindanao ang Solar Sports bilang partner para sa TV coverage  ng liga, habang isa sa sponsors ang Sea Shore Resorts na matatagpuan sa Laiya, San Juan Batangas.

Aniya, bukod sa basketball, nakalinya ring isagawa ng PSAA ang volleyball, beach volleyball at iba pang sports.

Imbitado bilang panauhing pandangal sa opening ceremony sa Marso 3 sa Ynares Coliseum sa Pasig City si DILG Secretary Benjamin ‘Benhur’ Abalos, Jr.

Nakalinya ang liga para sa hivgh school student (boys and girls) sa 18-under class, 16-under, 14-under at 12-under. (HATAW NEWS TEAM)