HATAW! D'yaryo ng Bayan hatawtabloid.com
Isumbong mo
kay DRAGON LADY
ni Amor Virata
TOTOO nga ang kasabihang “birds of the same feather flock together”!
Napatunayan natin ito nang mabasa ko ang ‘praise release’ ni Senador Risa Hontiveros, pinuri niya ang pag-disallow ng Energy Regulatory Commission (ERC) sa mga gastusin ng National Grid Corporation of the Philippines (NGCP).
Kung hindi tayo nagkakamali, ang namumuno ngayon sa ERC, ay nasa likod ng malalaking rally ni dating VP Leni Robredo noong 2022 presidential elections.
May nakapagbulong sa atin kapatid, na si Ginggay Hontiveros ang nagpapatakbo ng PR operations ng Aboitiz dati.
Kaya hindi nakakapagtaka na si Hontiveros ang unang pumalakpak sa resolusyon ng ERC.
Hanga ako kay Hontiveros bilang bagong mukha ng oposisyon, pero napakalaking sablay ang laman ng kanyang praise release.
Para sa kaalaman ni Hontiveros, lahat ng gastos at kita ng NGCP ay regulated at aprobado ng ERC, hanggang sa huling sentimo. Baka naman, alam nya ito, at nagkukunwari lang para idiin nang husto ang NGCP at magpakabibo.
Mismong ERC din ang nag-atas sa NGCP na magsagawa ng corporate social responsibility (CSR) para makatulong sa mga komunidad na apektado ng mga transmission line at tower.
Ang mga patakaran naman ukol sa mge benepisyo ng mga empleyado, public relations, at advertising ay saklaw ng parehong patakaran na ipinatupad noon sa ikatlong regulatory period na sinunod lang ng NGCP.
Inamin ng ERC, bigo silang magsagawa ng kailangang regulatory reset kada limang taon, at minamadali nya ang nakaraang 4th at kasalukuyang 5th reset. Ang katagang ginamit nya? RUSHED. Ibig sabihin, bahala na, basta matapos.
Ngayon, bakit sinisisi ang NGCP kung ang kapalpakan ay mismong galing sa ERC? Nahihirapan ang NGCP dahil sinusunod lang nito ang mga patakarang inilatag ng ERC bilang regulator.
Panahon na para tutukan ng ERC ang mandato nito na palakasin ang energy system ng bansa sa pamamagitan ng koordinasyon at tamang mga polisiya.
Kung patuloy na gigipitin ng ERC ang mga kompanya gaya ng NGCP, tiyak na mawawalan ng interes ang mga negosyante na mamuhunan sa Filipinas at dadalhin ang kanilang pera sa ibang bansa.
Para naman kay Sen. Hontiveros, pag-aralan niyo po munang maigi ang isang isyu bago sumawsaw para hindi kayo magmukhang tanga.
Huwag ninyong hayaan na magamit kayo para sa pansariling kapakanan ng mga nanggigipit sa NGCP at nagnanais na mabangkarote ang kompanya.
