HATAW! D'yaryo ng Bayan hatawtabloid.com
ARESTADO ang limang indibidwal na sinabing lumabag sa batas sa ikinasang kampanya kontra kriminalidad ng Bulacan PNP, nitong Sabado, 4 Nobyembre.
Batay sa mga ulat na isinumite kay P/Col. Relly Arnedo, Provincial Director ng Bulacan PPO, nagsagawa ng anti-illegal drug operation ang mga operatiba ng Pulilan at Angat MPS na nagresulta sa pagkakadakip ng dalawang drug suspects.
Nakompiska mula sa mga suspek ang kabuuang pitong sachet ng hinihinalang shabu na tinatayang 10.82 gramo at nagkakahalaga ng P73,584, at buybust money.
Dinala ang mga naarestong suspek at ang mga nakompiskang ilegal na droga sa Bulacan Provincial Forensic Unit para sa kaukulang pagsusuri, habang inihahanda na ang mga kasong kriminal na isasampa laban sa mga suspek.
Samantala, sa isinagawang manhunt operation ng tracker team ng Sta. Maria MPS, dinakip ang dalawang wanted persons sa bisa ng Warrant of Arrest.
Gayondin, nasakote ang isang 22-anyos babae sa Brgy. Ang Santo Rosario, Paombong ng mga tauhan ng Paombong MPS sa kasong pagnanakaw matapos nitong puwersahang pasukin isang bahay at tangayin ang isang pulseras, dalawang piraso ng alahas, at P2,000 cash.
Kasalukuyang nasa kustodiya ng arresting police station ang suspek para sa kaukulang disposisyon.
Pahayag ni P/Col. Arnedo, ang Bulacan PNP ay nakatuon sa pagpapanatiling ligtas laban sa mga krimen ang komunidad at sila ang may kakayahang pigilan ang mga indibidwal na nag-uudyok ng takot at gumagamit ng karahasan. (MICKA BAUTISTA)
