HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
KUNG ang iba’y nagagalit, ine-enjoy o ikinatutuwa naman ni Kim Chiu na kamuhian o isumpa-sumpa siya ng netizens.
“Ito ‘yung masasabi kong hate that I love, ‘yung hate messages that I love… Masaya talaga ako rito sa kind of hate na natatanggap ko,” paliwanag ni Kim sa thanksgiving mediacon para sa Linlang.
“Nagpapasalamat ako sa mga director ko dahil pinauulit nila sa akin kapag kumi-Kim Chiu levels ‘yung ano ko (acting). ‘O si Kim Chiu ‘yan, ulitin natin.
“So, ang tiyaga-tiyaga nila sa akin para maging si Juliana (karakter na ginagampanan ni Kim sa Linlang) ako. Kaya malaki rin ang pasasalamat ko sa writers, sa creatives, sa directors namin. Sa lahat actually ng bumubuo ng ‘Linlang.’ Kasi ito ‘yung hate na nagustuhan ko. Keep them coming. I love it,”nakangiting sabi pa ng aktres.
Nasabi rin ni Kim na siya man ay nagugulat sa ginagawa ni Juliana. At naiinis din siya at the same time.
“Kapag pinanonood ko siya, nagugulat ako. For the longest time hindi ko naiisip na gagawin ko ito. May tamang timing pala sa lahat ng bagay. Nagpapasalamat din ako sa Dreamscape na ibinigay nila sa akin itong role na ito, nag-explore at tumaya sila sa akin as Juliana,” sabi pa ni Kim.
“Ako, naiinis din ako sa kanya. Actually habang ginagawa ko siya kaya nga kalaban ko lagi ang sarili ko. Pero siyempre kailangan kong maniwala sa ginagawa ni Juliana para kapag inarte ko siya ay magagalit kayo katulad sa sarili ko as Kim Chiu naiinis din talaga ako sa kanya.”
Samantala, itinanggi ni Kim ang ukol sa chikang hiwalay na sila ng kanyang boyfriend na si Xian Lim.
“Kayo talaga, baka nalilinlang lang kayo,” ang natatawang sabi ni Kim.
“Okay na okay naman kami ni Xi,” giit niya.
Kaya maliwanag na isang malaking fake news ang naglalabasang intriga na may problema sina Kim at Xian.
“Mapanlinlang ang showbiz pero maayos naman, masaya,” anang dalaga.
Ang Linlang ay napapanood sa Prime Video at kasama rin dito sina Paulo Avelino, JM de Guzman, Kaila Estrada, Ruby Ruiz, at Ms Maricel Soriano.
