Pelikula isusunod na pagsasamahan ng ABS-CBN at GMA

SHOWBIZ KONEK
ni Maricris Valdez Nicasio

MASAYANG ibinalita ni Atty Annette Gozon-Valdes, GMA executive, na hindi natatapos ang partnership nila sa ABS-CBN sa matagumpay na pagpapalabas ng Unbreak My Heart.

Sa finale media conference ng kauna-unahang TV show collaboration, inihayag ng GMA executive na may plano rin silang gumawa pa ng maraming proyekto sa Kapamilya.

Anang GMA Senior Vice President for Programming, isa sa inaasahan niyang collaboration pa ay ang paggawa ng pelikula sa ABS-CBN’s Star Cinema sa susunod na taon.

Hindi naman imposibleng mangyari ito dahil may kontrata na pala sa kanila ang Star Cinema hindi nga lang agad iyon naisagawa dahil sa pandemic.

“Wala pang cast in stone but we’re hoping na mayroon pang collaborations. Sana next year. Sana may movies, makagawa na. We’ll start na makipag-usap. We’ll see,” esplika ng Ms Annette.

“Noong ABS-CBN Ball nakausap ko ulit sila Kris Gazmin pati sina Carlo Katigbak, Cory Vidanes. Sabi ko, ‘gawa na tayong movie.’ Kasi gusto na rin nila eh. Siguro matutuloy na next year,” pagbabahagi pa ng executive.

At kapag natuloy na ang collab nila sa Star Cinema, gusto niyang si Barbie Forteza ang magbida kasama ng sinumang mapipiling Kapamilya actor. 

Sa kabilang banda, pinasasalamat ni Ms Annette ang ABS-CBN para sa matagumpay na pagpapalabas ng Unbreak My Heart pinagbibidahan nina Jodi Sta. Maria, Gabbi Garcia, at Joshua Garcia.

“I would like to really thank our partners, of course, ABS-CBN for giving us such a beautiful show. Thank you to the stellar cast, the brilliant creatives, and the production crew behind ‘Unbreak My Heart.

“What I can say is it has been a joy and a pleasure to work with ABS. I hope that this is the first of many.”