Ivana pinagmalditahan ng ilang artista sa GMA

MA at PA
ni Rommel Placente

NAKATUTUWA naman si Barbie Forteza, puring-puri siya ng mga nakakatrabaho niya. Sa kabila ng kanyang kasikatan ay hindi pa rin siya nagbabago.

Isa sa mga pumupuri sa kanya ay ang Kapamilya actress na si Ivana Alawi.

Sa Q & A vlog ni Ivana, tinanong ang Kapamilya actress kung sino sa mga GMA artist ang pinaka-naging nice niyang nakatrabaho. Ang sagot nito, si Barbie Forteza.

Sabi ni Ivana, “Maraming nagmamaldita sa ’kin noong nag-i-start ako sa GMA, as in maraming masusungit. Ayaw tayong bigyan ng puwesto, ayaw kaming bigyan ng pagkain tapos sinusungitan kaming mag-ina.

“Basta marami. And then ang pinaka-naging mabait sa akin na hindi ko makakalimutan, hindi ko pa siya nakakausap after, pero si Barbie Forteza.”

Nakarating kay Barbie ang papuri ni Ivana sa kanya. At nagpasalamat ang una sa huli na idinaan niya sa pamamagitan ng kanyang social media account.

“Grabe naman to. Maraming salamat, @IvanaAlawi so happy for all your success. Ingat kayo ni Mona. Hi po tita!” sey ni Barbie.

Maging ang direktor at komedyanteng si John Lapus ay saksi sa pagiging mabait at mabuting tao ni Barbie.

Sa pamamagitan ng kanyang Twitter account ay ibinandera niya ang kabaitan ng dalaga.

Post ni John sa minsang encounter nila ni Barbie, “Mabait talaga si @dealwithBARBIE minsan nilapitan pa nya ako sa sinehan para lang mag hello at ipakilala si Jack to think na magkalayo kami ng upuan.”

Matapos mabasa ang papuri sa kanya ni John  ay agad namang nagpasalamat ang aktres.

“Maraming salamat po, Direk @KorekKaJohn [Sweet]. sana po magkawork po tayo ulit,” sey ni Barbie.