Wanted sa rape
KILABOT NA MANYAKIS NASAKOTE

NAGWAKAS ang maliligayang araw ng isang pinaniniwalaang kilabot na rapist nang matunton ng mga awtoridad ang kanyang pinagtataguan hanggang tuluyang madakip sa lungsod ng San Jose del Monte, lalawigan ng Bulacan, nitong Linggo, 30 Hulyo.

Sa ulat na ipinadala kay P/Col. Relly Arnedo, Provincial Director ng Bulacan PPO, kinilala ang suspek na si Alan Apolo, isang welder.

Nakatala si Apolo bilang rank #1 city level most wanted person (MWP) sa San Jose del Monte. Naaresto siya ng mga tauhan ng San Jose del Monte CPS habang nagtatago sa Brgy. Gaya-Gaya.

Pinaghahanap si Apolo ng batas dahil sa tatlong bilang ng kasong qualified statutory rape, batay sa warrant of arrest na inilabas ng San Jose del Monte RTC Br. 5 FC.

Matapos sampahan ng kaso, nabatid na nagpakatago-tago at nagpalipat-lipat ng tirahan si Apolo ngunit sa masusing pagmamatyag ng pulisya ng lungsod ay nagresulta ito sa kanyang pagkakaaresto.

Dahil sa bigat ng kasong kinakaharap, walang inirekomendang piyansa ang korte para sa pansamantalayang Kalayaan ng akusado na ngayon ay nasa custodial facility ng San Jose del Monte CPS. (MICKA BAUTISTA)