Rebeldeng NPA sumuko sa  Bulacan cops

Boluntaryong sumuko sa mga awtoridad ang isang miyembro ng Communist Party of the Philippines-New People’s Army (CPP-NPA) sa Lungsod ng Malolos, Bulacan nitong Biyernes, Hunyo 16.

Batay sa ulat kay PColonel Relly B. Arnedo, provincial director ng Bulacan Police Provincial Office (BUL PPO), kinilala ang sumukong rebelde bilang si alyas Ka Ogie, 41, electronics technician, na miyembro ng Rebolusyonaryong Hukbong Bayan (RHB), at kumikilos sa coastal area ng Manila at Bulacan. 

Napag-alamang si alyas Ka Ogie ay nahimok na sumapi sa nasabing rebeldeng grupo para aniya sa pagbabago sa gobyerno.

Ayon sa Force Commander ng 1st Provincial Mobile Force Company (PMFC), dakong alas-12:30 p.m. sa Camp Alejo S Santos, Brgy. Guinhawa, Malolos, Bulacan, ang magkasanib na mga elemento ng PMFC, Bulacan PIU, 2nd PMFC, 301st MC RMFB, 24th SAC, 2SAB PNP SAF, at 70IB PA ang nagsaayos ng pagsuko ni alyas Ka Ogie.

Isinuko rin ni alyas Ka Ogie ang isang hindi lisensiyadong baril na cal..22 snub nose revolver na walang serial number, at anim na piraso ng bala ng  cal .38.

Ang sumukong rebelde ay kasalukuyang nasa ilalim ng kustodiya ng 1st PMFC para sa imbestigasyon at  custodial debriefing. (MICKA BAUTISTA)