HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
KUNG may isang honest na artistang kilala namin, isa si Joshua Garcia dahil na rin sa hindi marunong magtago ng tunay na saloobin o nararamdaman sa mga bagay-bagay. Tulad na lang ng naganap na pag-amin nito sa grand mediacon na isa siya sa mga bida ng TV series na Unbreak my Heart, na umamin sa kung ano ang pinaka-nakababaliw niyang ginawa nang mabigo sa pag-ibig.
Inamin ni Joshua na nagbabad siya sa computer ng dalawang araw na halos walang ligo.
Ito ang isiangot ni Joshua nang matanong sa kung ano ang craziest thing na nagawa niya noong heartbroken siya.
Pag-amin ni Joshua na nangyari iyon noong pandemic, Aniya, natatadaan niyang nagbabad siya sa computer ng dalawang araw na walang liguan at walang tayuan.
“‘Yung computer nakatulong sa akin, it’s an escape for me,” paliwanag ng binata.
Pero naisio niyang hindi rin nakatulong sa kanya ang ginawang iyon.
“Kasi naging escape siya roon sa nararamdaman ko. Noong nagsawa ako sa computer, mas doon ko naramdaman lahat. Doon ko nai-process lahat,” sambit ni Joshua.
At nawala lang ang sama ng loob at hinanakit niya nang tinanggap niya ang nangyari sa kanya.
Bagamat hindi tinukoy ni Joshua kung sino ang girl na tinutukoy niyang nakasakit ng kanyang puso, alam naman nating ang huling public relationship niya ay ang sa kanila ni Julia Barretto.
Samantala, ang Unbreak my Heart ang unang-unang collaboration ng dalawang industry giants na ABS-CBN and GMA-7. Bukod kay Joshua, tampok din sina Jodi Santa Maria at Gabbi Garcia gayundin sina Laurice Guillen, Richard Yap, Sunshine Cruz at marami pang iba.
Kinunan sa mga scenic location ng Switzerland, Italy, at Pilipinas ang serye. Ipinrodyus ito ng Dreamscape Entertainment at idinirehe nina Manny Palo at Dolly Dulu.
Nagsimula ang pagpapalabas ng Unbreak My Heart kahapon, May 29, 9:35 p.m. sa GMA Telebabad, Pinoy Hits and I Heart Movies. Mapapanood din ito sa Viu.
Ang istorya ay uko sa isang bawal na pag–ibig na magdadala ng sakit at hinagpis sa mga karakter nina Jodi, Richard, Gabbi, at Joshua.
Iikot ang kuwento kay Rose (Jodi), isang babaeng durog na durog ang puso dahil sa kanyang masalimuot na nakaraan at ngayon ay gustong mabuo muli ang kanyang pamilya matapos niya itong iwanan.
Sa kalagitnaan ng pagtatama ng kanyang mga kasalanan, mahuhulog ang loob ni Rose kay Renz (Joshua), isang gwapong lalaking magiging sandalan niya sa kabila ng mga personal na problema nito at mauuwi sila sa kapana-panabik na May-September love affair.
Sa kabila nito, makikilala ni Renz ang isang sexy at magandang babaeng si Alex (Gabbi) na handang ipaglaban ang kanilang nabuong pag-iibigan.
Magiging komplikado ang buhay nina Rose, Renz, at Alex dahil maiipit sila sa love triangle. Iigting pa lalo ang kanilang mga emosyon dahil sa patong-patong na mga problema nang sumulpot si Matt (Richard) sa kanilang mga buhay para protektahan ang pamilya niya.
Mapapakinggan din sa serye ang official soundtrack tampok ang mga awitin nina Christian Bautista, Bey, at Moira dela Torre.
