AiAi naluha sa storycon ng Litrato, nabigong makabuo ng baby via IVF

SHOWBIZ KONEK
ni Maricris Valdez Nicasio

HINDI napigilan ni Ai Ai delas Alas na maiyak nang mausisa ang ukol sa paggawa nila ng baby ng asawang si Gerald Sibayan.

Sa story conference ng Litrato na prodyus ng 3:16 Media Network at ididirehe ni Louie Ignacio, hindi napigilan ng komedyante ang maluha.

Ang dahilan ng pag-iyak ni AiAi aniya ay ang hindi pagkabuo ng dalawang eggs na kinolekta para isailalim sa in vitro fertilization.

Sa IVF, ang mga matured eggs ay kinokolekta (retrieved) mula sa obaryo para ma-fertilize ng sperm sa laboratory.

Ani Ai Ai dalawang beses na nilang sinubukang makabuo sa pamamagitan nga ng in vitro fertilization, pero nabigo sila.

“‘Yun kasing mga ano namin, ‘yung babies namin, yung dalawa… ayan, tingnan mo, naluluha na naman ako.

“Yung dalawa, hindi natuloy. Isa na lang ang natira,” pigil na pigil na maluhang paglalahad ng aktres subalit hindi na napigilan pa ni Ai Ai.

Samantala, umuwi lang si Ai Ai para gawin ang pelikulang Litrato na sinabi ni direk Louie na hindi niya gagawin kung hindi si Ai Ai ang magbibida.

Sa totoo lang masuwerte ang tambalan nina Ai Ai at direk Louie dahil kung ilang beses kinilala ang galing ng aktres sa iba’t ibang award giving bodies, local at international sa mga pelikulang ginawa niya, ang Area at School Service. 

Gagampanan ni Ai-Ai ang isang lolang may Alzheimer’s at gaganap na anak niya si Ara Mina at apo si Quinn Carillo.

Kasama rin sa pelikula ang mga bagong talents ng 3:16 Media na sina Rowan Diaz at Duanne David gayundin ang magaling na aktor na si Bodjie Pascua.

Ang Litrato ay isinulat ni  Ralston Jover, na kaklase pala ni Ai-Ai noong Grade 6.