Pimentel kay FM Jr.:
MAGTALAGA NG REGULAR AGRICULTURE SECRETARY

NANINIWALA si Sen. Aquilino “Koko” Pimentel III na pinahihirapan lang ni Pangulong Ferdinand R. Marcos Jr., ang kanyang sarili sa pagtayo bilang agriculture secretary kaya dapat magtalaga na siya ng regular na kalihim ng kagawaran.

Sinabi ni Pimentel, malaki ang magiging tulong nito sa pangulo at puwede naman niyang gawing prayoridad ang agrikultura ng bansa kahit hindi na siya ang kalihim.

“Pinahihirapan lang niya ang kanyang sarili. Sayang e, the mere fact na may inaayos na silang value chain, ibig sabihin meron na siyang pointman d’yan sa agri dep’t, e tawag lang nila sa tao ay senior undersecretary,” sabi ng senador sa programang Sa Totoo Lang sa One PH kagabi.

Hindi naman aniya bawal na gawing prayoridad ni FM Jr., ang agrikultura dahil lahat naman ng kalihim sa mga kagawaran ay nagsisilbing alter ego ng pangulo.

Nauna rito, nanindigan si FM Jr., na mas mabilis matutugunan ang iba’t ibang suliranin sa agrikultura kapag ang punong ehekutibo ang kalihim ng Department of Agriculture (DA).

“Kapag hindi nila ginawa ‘yung utos ko, puwede nilang sitahin. ‘Yung secretary, it can still be may pakiusap pa,” aniya sa panayam kamakalawa.

“That’s what I bring to the position. When I make a decision, when I make a plan, kailangan masunod ‘yun. If not, I can chastise them, move them aside, push them into other positions,” dagdag niya.

Mula magsimula ang termino ni FM Jr., bilang Pangulo at DA secretary noong Hunyo 2022, tumaas nang husto ang presyo ng mga pangunahing bilhin, pati na ng asukal, sibuyas at itlog. (ROSE NOVENARIO)