Zanjoe inamin tunay na relasyon kay Ria

SHOWBIZ KONEK
ni Maricris Valdez Nicasio

HINDI na nagpaligoy-ligoy si Zanjoe Marudo at diretsahang inaming girlfriend na niya si Ria Atayde.

Ang pag-amin ay naganap sa show ni Karen Davila, ang Headstart sa ANC kasabay ng pagpo-promote nila ng bagong seryeng pagbibidahan sa ABS-CBN, ang Dirty Linen kasama si Janine Gutierrez.

Ang tanong ni Karen sa kanya, “I heard you were in a relationship right now. Kay Zanjoe muna tayo, you’re in a relationship right now?”

“Yes. Parang it’s out in the open naman na, so yes,”  sagot ni Zanjoe nang matanong ni Karen ang relasyon niya kay Ria.

At sinundan agad ng katanungang kung may plano na ba siyang mag-asawa sa lalong madaling panahon. 

“Ang aga, 9 o’clock pa lang. Ha-hahaha!” pabirong tugon ni Zanjoe at saka sinabing,  “Sobra lang akong nag-e-enjoy ngayon sa sitwasyon ng buhay ko, sa career ko, sa personal life, pero ‘yung mga ganyang bagay (pagpapakasal at pag-aasawa), masyado pang maaga.”

October, 2022 nang ihayag ni Sylvia Sanchez na nasa “dating stage”  ang kanyang anak na si Ria at si Zanjoe.

Hindi naman ikinaila na boto siya kay Zanjoe para sa anak dahil aniya, masipag at responsable ang  aktor at nakikita niyang mabait at marespeto iyon.