Madam Inutz suportado ang pagiging macho dancer ng BF

MA at PA
ni Rommel Placente

HINDI ikinahihiya ni Madam Inutz na ang boyfriend niya na si Tantan, ay isang macho dancer.

At dahil sa trabaho ni Tantan bilang entertainer, hindi maiiwasang maraming babae at gay ang nagpapakita ng motibo rito. Pero kampante si Madam Inutz sa loyalty ni Tantan.

“’Ika nga, hangga’t sa iyo umuuwi, wala kang dapat ikagalit. Tiwala lang talaga at saka pang-unawa. Kasi unang-una, roon ko siya nakilala, eh. ‘Di ako selosang babae,” ani Madam Inutz.

Sa mga nagsasabi naman na baka siya ang bumubuhay sa karelasyon na si Tantan, na may dalawang anak na sinusuportahan, ang sagot niya, “’Yun ang tingin ng tao, hindi natin maalis iyan. May work siya sa bar at saka nagsasama kami sa pagba-vlog. Kahit paano nasisingit na rin siya,” pagtatanggol pa ni Madam Inutz sa boyfriend.

Natutuwa si Madam Inutz na tanggap ng mga anak niya at ng mga anak ni Tantan ang kanilang relasyon.

Pero kahit maganda at tahimik ang takbo ng relasyon nila ni Tantan, aminado si Madam Inutz na hindi pa nila napag-uusapan ang tungkol sa kasal.