Cristy nagbigay ng update kay Kris: tapos na ang gamutan

MA at PA
ni Rommel Placente

ISA sa napag-usapan sa online show nina Cristy Fermin, Morly Alinio, at Romel Chika na Showbiz Now Na, ang kalagayan ni Kris Aquino, na ayon sa una ay tapos na ang gamutan para sa karamdaman nito.

Ayon sa source ni tita Cristy, lumipad na si Kris mula Houston, Texas patungong Los Angeles, California para roon magpagaling kasama ang mga anak na sina Josh at Bimby.

Sabi ni Cristy, “At kinukompirma po ng aming sources na nasa LA na po talaga si Kris Aquino. Roon na po muna sila titira ng kanyang mga anak na sina Josh at Bimby at doon na raw muna siya magpapagaling. So ibig sabihin, tapos na ‘yung misyon at proseso sa Houston… Alangan namang magpabalik-balik pa siya from California to Texas.

“Noon kasi, sobra ang pagwo-worry at pag-aalala ng sambayanang Filipino. ‘Yung kanyang itsura, pagkapayat payat. Tapos kung ikuwento pa niya ‘yung kanyang sakit, padagdag nang padagdag. Kaya ang daming nagtataka ngayon. Bakit mula roo , nandito na ngayon sa LA. Parang ang bilis,” dagdag pa niya.

“Kung sakali man po na siya ay nakaligtas na sa ipinag-aalala nating sakit, lahat tayo maligaya pero kailangan ng paliwanag,” ayon pa kay Cristy.