Palutang-lutang sa ilog
NAWAWALANG ESTUDYANTE NATAGPUANG PATAY

NATAGPUANG palutang-lutang sa ilog nitong Sabado ng umaga, 20 Agosto, ang wala nang buhay na katawan ng isang babaeng naiulat na ilang araw nang pinaghahanap sa bayan ng Marilao, lalawigan ng Bulacan.

Kinilala ang biktimang si Juliana Marie Billones, 21 anyos, first year college student, at residente sa Brgy. Nagbalon, sa nabanggit na bayan.

Sa tala ng Marilao MPS, iniulat sa kanila na umalis sa kanilang bahay si Juliana Marie noong Huwebes, 18 Agosto, ngunit hindi na nakauwi kaya nag-report ang kanyang ina sa estasyon ng pulisya.

Ayon sa ina ng biktima, gabi ng Agosto 18 nang magkaroon sila ng pagtatalo ng anak at bigla na lamang umalis ng bahay si Juliana Marie at hindi na umuwi.

Nakita sa kuha ng CCTV ang pagtakbo ng biktima palabas mula sa kanilang bahay nang nakayapak lamang.

Patuloy ang isinasagawang imbestigasyon ng mga tauhan ng Marilao MPS upang matukoy ang dahilan ng kamatayan ng biktima. (MICKA BAUTISTA)