Sa Angeles City, Pampanga
‘KANO NASABAT SA DRUG BUST

ARESTADO ang isang American national matapos bentahan ng ilegal na droga ang undercover PDEA agent sa ikinasang buy bust operation sa isang motel sa Brgy. Balibago, lungsod ng Angeles, lalawigan ng Pampanga, nitong Linggo, 3 Hulyo.

Kinilala ng mga operatiba ng PDEA Pampanga ang arestadong suspek na si James Baginski, 57 anyos, American national at residente sa Kandi Tower, Brgy. Malabanias, sa nabanggit na lungsod.

Nabatid na si Baginski ay mula sa Hawaii, USA at nasa bansa simula pa noong 2019.

Isinailalim ang suspek sa surveillance ng PDEA kasunod ang tip mula sa isang confidential informant simula pa nitong Hunyo.

Nakuha kay Baginski ang isang selyadong sachet ng hinihinalang shabu na may timbang na limang gramo at tinatayang nagkakahalaga ng P34,500; dalawang self-sealing transparent plastic sachet na naglalaman ng hinihinalang cocaine, driver’s license; cellphone; at buy bust money.

Nakatakdang sampahan ang suspek ng kasong paglabag sa Section 5 (sale of dangerous drugs), Article II ng RA 9165 o Comprehensive Dangerous Drugs Act of 2002 ang suspek. (MICKA BAUTISTA)