HATAW! D'yaryo ng Bayan hatawtabloid.com
Sa pagpapatuloy ng ikatlong araw ng pinaigting na Simultaneous Anti-Criminality Law Enforcement Operation (SACLEO) ng Bulacan PPO, sunod-sunod na nadakip ang 51 kataong pawang may mga paglabag sa batas sa iba’t ibang lugar sa lalawigan hanggang Huwebes ng umaga, 26 Mayo.
Sa ulat kay P/Col. Charlie Cabradilla, acting provincial director ng Bulacan PNP, naaresto ang 25 suspek sa iba’t ibang buybust operations na ikinasa ng Station Drug Enforcement Unit (SDEU) ng mga police stations ng Balagtas, Baliwag, Bocaue, Bulacan, Bustos, Marilao, Meycauayan, Obando, Plaridel, Pulilan, San Ildefonso, San Jose del Monte, San Miguel at Sta. Maria.
Narekober sa isinagawang operasyon ang kabuuang 75 pakete ng hinihinalang shabu, pitong pakete ng tuyong dahon ng marijuana, at buybust money na ginamit na pain ng poseur buyer.
Samantala, nasakote sa isinagawang anti-illegal gambling operations ng mga operatiba ng Pulilan MPS, 1st at 2nd Provincial Mobile Force Company (PMFC) ang 14 kataong naaktuhan sa pagsusugal ng tong-its at pusoy.
Nakumpiska mula sa kanila ang isang set ng baraha, mesa, mga upuan na gamit sa pagsusugal, at perang taya sa iba’t ibang denominasyon.
Nadakip din sa Brgy. San Nicolas, Hagonoy, ng mga element ng Hagonoy MPS ang suspek na kinilalang si Oliver Salamat sa bias ng search warrant kung saan nasamsaman ng isang cal .9mm Norinco, isang magasin para sa cal .9mm, at walong pirasong bala.
Sa inilatag ding manhunt operations, nasukol ang 11 kataong pinaghahanap ng batas ng tracker teams ng mga police stations ng Hagonoy, Meycauayan, San Ildefonso, San Jose del Monte, Bustos, Doña Remedios Trinidad, at San Rafael, at mga tauhan ng 1st at 2nd PMFC, Bulacan PHPT, 301st RMFB3, at 3rd SOU Maritime Group.
Kinilala ang isa sa mga suspek na si Rolando Camangon, Most Wanted Person ng Hagonoy MPS, na inaresto sa kasong Lasciviousness Conduct sa ilalim ng Sec 5 (b) ng RA 7610 (Child Abuse Law), samantalang ang 10 pang wanted persons ay dinakip sa mga krimeng RIR Physical Injury & Damage to Property; paglabag sa RA 7610; Direct Assault Upon an Agent of a Person in Authority; Qualified Trespass to Dwelling; Attempted Homicide; Estafa; paglabag sa BP 22 (Bouncing Check Law); Unjust Vexation; Rape at Theft. (Micka Bautista)
