Barker vs barker lalaki sugatan

ARESTADO ang isang miyembro ng Sputnik gang nang saksakin ang kapwa barker na nakaasaran sa pagtatawag ng mga pasahero, sa Pasay City, kamakalawa ng hapon.

Kinilala ni Pasay City Police chief, P/Col. Cesar Paday-os, ang suspek na si Rolando Reano, 44, barker ng Zamora St., Pasay City, nakapiit sa Pasay City police custodial facility.

Inoobserbahan sa San Juan de Dios Hospital ang 26-anyos kapwa barker na si Lorenzo Sadaya, dahil sa dalawang saksak sa tiyan.

Sa ulat, dakong 5:00 pm ng 8 Mayo nang maganap ang insidente sa panulukan ng EDSA at Zamora St., sa Pasay City kamakalawa.

Sa imbestigasyon, sabay na nagtatawag ng pasahero ang dalawang barker nang nagkainisan hanggang nagtatalo kaya bumunot ng mahabang ice pick ang suspek saka inundayan ng dalawang tusok sa tiyan ang biktima bago tumakas.

Sa follow-up operation ng Pasay Police Sub-Station 4, nahuli ang suspek at nakuha ang ginamit na ice pick. (GINA GARCIA)