HATAW! D'yaryo ng Bayan hatawtabloid.com
PATAY ang isang binata matapos barilin ng isang pulis na sinasabing naingayan sa kuwentohan sa bayan ng Bacolor, lalawigan ng Pampanga nitong 20 Nobyembre 2021.
Nabatid na tinamaan ng bala ang dibdib at leeg ng biktimang kinilalang si Abelardo Vasquez, Jr., 19 anyos, mula sa baril ng suspek na pulis na kinilalang si P/Cpl. Alvin Pastorin.
Ayon sa pinsan ng biktima, nagkukuwentohan silang magtitiyuhin sa labas ng kanilang bahay nang bigla silang sitahin ni Pastorin.
Sinabing naingayan ang pulis sa kanila at tinulak ang kanilang tiyuhin nang tangkain siyang kausapin.
Hinabol umano ng biktima ang pulis at doon na biglang nagpaputok ng warning shot na sinundan ng tatlo pang putok hanggang bumulagtang wala nang buhay ang biktima.
Sa ulat ng Bacolor police, sinita ang magpipinsan dahil wala silang suot na face mask at mga damit pang-itaas.
Dito nagkaroon ng pagtatalo ang grupo hanggang umalis ang pulis at nagtungo sa kanyang sasakyan.
Sinabi rin sa report na pinagbabato umano ng grupo ang sasakyan ni Pastorin at nangamba sa kanyang buhay kaya nagpaputok ng baril hanggang tamaan ang biktima.
Wala pang pahayag mula kay Pastorin ngunit nasa ilalim na siya ng kustodiya ng Bacolor Police.
Samantala, desidido ang pamilya ng biktima na magsampa ng kaso at papanagutin ang suspek. (MICKA BAUTISTA)
