HATAW! D'yaryo ng Bayan hatawtabloid.com
NADAKIP ang itinuturing na pang-apat na most wanted person (MWP) ng Leon Postigo, Zamboanga Del Norte sa inilatag na manhunt operation ng pulisya sa lungsod ng Meycauayan, lalawigan ng Bulacan, nitong Lunes, 1 Nobyembre.
Sa ulat na ipinadala kay P/Col. Manuel Lukban, Jr., acting provincial director ng Bulacan PNP, kinilala ang nadakip na suspek na si Jonathan Ambang Sangcom na nasukol sa Sto. Niño Robinson, sa nabanggit na lungsod.
Ikinasa ang manhunt operation laban sa akusado ng magkasanib na mga operatiba ng CIDG Zambaoanga Del Norte PFU9 bilang lead unit, CIDG ZSP PFU, CIDG ZCFU, CIDG DSOU, RHPU9, Leon Postigo MPS, at Meycauayan CPS, Bulacan PPO.
Inaresto si Sangcom sa bisa ng warrant of arrest sa kasong Rape kaugnay sa RA 7610 (Anti-Child Abuse Law) na walang itinakdang piyansa.
Nakatakda nang ibiyahe ng mga awtoridad ang suspek patungong Leon Postigo, Zamboanga del Norte kung saan naganap ang kinasasangkutang krimen. (MICKA BAUTISTA)
