HATAW! D'yaryo ng Bayan hatawtabloid.com
PATAY sa isang propesor na ‘target’ itumba, ang dalawang hinihinalang hired killer, nang mauwi sa barilan ang pananamabang nitong Martes ng hapon, 21 Setyembre, sa bayan ng Datu Odin Sinsuat, sa lalawigan ng Maguindanao.
Ayon kay P/Lt. Col. Rommel dela Vega, hepe ng lokal na pulisya, nagmamaneho ang biktimang si Prof. Daud Kadon ng Mindanao State University – Maguindanao ng Toyota Fortuner patungong lungsod ng Cotabato nang pagbabarilin ng dalawang armadong lalaking sakay ng isang motorsiklo dakong 5:00 pm kamakalawa.
Bagaman sugatan, gumanti ng putok si Kadon laban sa mga suspek na agad ikinamatay ng isa habang tuluyang binawian ng buhay ang kanyang kasama sa pagamutan.
Kinilala ni P/Lt. Dela Vega ang mga napaslang na suspek na sina Montano Usman ng bayan ng Talitay; at Abdul Mama ng Brgy. Tamontaka, bayan ng Datu Odin Sinsuat, pawang sa naturang lalawigan.
Ayon sa pulisya, kinuha na ng kanilang mga kaanak ang mga labi ng dalawang suspek.
Patuloy na iniimbestigahan ang insidente upang matukoy ang motibo sa tangkang pamamaslang kay Kadon.
