HATAW! D'yaryo ng Bayan hatawtabloid.com
HABANG nagsusyuting ang FPJ’s Ang Probinsyano na pinangungunahan ni Coco Martin sa mala-palasyong bahay ni Mayor Chavit Singson sa tabing dagat sa Narvacan na halos katulad ng mga nagsisipaglakihang bahay ng mga super sikat na Hollywood personalities sa California, nasa South Korea ang masipag at galanteng alkalde para mag-invest ng $100-M sa nasabing bansa.
Katatapos lang pumirma si Mayor Chavit ng memorandum of understanding para sa $1.7-B resort development project. Kasama ng butihing mayor dito ang Gangwon Province government, East coast Free Economic Zone Authority, Korea Investment & Securities Co. at Hyundai Asset Management Co..
Kasali sa proyektong ito ang pagpapatayo ng resort centers at ocean complexes sa Donghae City, na nasa 260 km silangang bahagi ang layo mula Seoul.
Plano rin ng LCS Group na pinamumunuan ni Mayor Singson ang pagbili ng properties para sa mga sarili nitong business doon.
Ang LCS group ang pinakaunang Philippine company na nag-invest para sa real estate development project sa South Korea.
Pagdating dito sa Pilipinas, ang group of companies ni Mayor Chavit ay nakatutok sa mining, transportation, defense, logistics, at telecommunication towers.
Bukod sa pag-i-invest ng madiskarteng mayor sa South Korea, tinututukan din ni Mayor Singson ang pagpapalagay ng solar panel para sa bagong parking lot ng public market sa Narvacan, Ilocos Sur. Ang solar panel ang pagmumulan ng supply ng koryente para sa charging stations ng electric jeepneys sa nasabing lugar. (MV)
