Kiko pinanindigang hindi pinagsabay sina Devon at Heaven

MA at PA
ni Rommel Placente

SA panayam ni Ogie Diaz kay Kiko Estrada, nilinaw ng aktor na walang katotohanan na pinagsabay niya ang ex niyang si Devon Seron at Heaven Peralejo. Wala raw overlapping na naganap.

Paliwanag ni Kiko, mabilis lang siyang naka-move on sa paghihiwalay nila ni Devon. Inamin din niya na pangit ang naging paghihiwalay nila ni Devon na nangyari nitong Valentine’s Day. Pero hindi niya ito niloko o pinagtaksilan.

Hindi naman niya inaasahang magiging sila ni Heaven, nang maging close sila matapos makipaghiwalay kay Devon.

Naiintindihan naman niya ang mga patama sa kanya ng kapatid ni Devon, dahil nasaktan ito sa nangyaring paghihiwalay nila ng aktres.