HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
AMINADO si Kylie Versoza na wild ang unang pinagbibidahan niyang pelikula, ang The Housemaid ng Viva Films kasama si Albert Martinez at mapapanood na sa Setyembre 10, 2021 sa Vivamax, KTX, iWant TFC, at TFC IPTV.
Sa virtual media conference, sinabi ni Kylie na bagamat wild erotic thriller movie, may limitasyon naman siya sa kung ano ang kaya niyang gawin at hindi.
“Nagawa naman natin lahat pero siyempre as an actress, I still have few restrictions,” sambit ng 2016 Miss International.
Puring-puri naman ni Kylie ang pagiging supportive ng kanyang boyfriend na si Jake Cuenca sa career niya.
“With regards to Jake, I really consider him as my mentor. Sa kanya ako pumupunta kapag may mga advise ako na kailangan. Minsan nga siya talaga ‘yung itinuturing kong acting coach.
“Siya rin ‘yung isa sa mga tao na nag-convince sa akin na gawin ito kasi magandang project. At sure ako na sasamahan niya ako na panoorin ito kasi sobrang supportive talaga ni Jake sa career ko,” ani Kylie.
Gagampanan ni Kylie ang papel ni Daisy, ang taga-pangalaga ng isang batang si Nami, anak ng bilyonaryong sina William (Albert), at Roxanne (Louise Delos Reyes) na may kambal sa sinapupunan.
Kasama rin si Jaclyn Jose, (Ms. Martha), ang Mayordoma na nakaaalam ng lahat ng nangyayari sa mansion. Nariyan din si Madam Ester (Alma Moreno), ang ina ni Roxanne. Tulad ng kanyang anak, sunod-sunuran lang din si Madam Ester kay William, pero may panahon para protektahan niya ang kanyang anak.
Ang The Housemaid ay idinirehe ni Roman Perez na hango sa South Korean film na ipinalabas noong 1960, at nagkaroon ng remake noong 2010, na ang orihinal na titulo ay Hanyo. Ang Hanyo ay naparangalan sa iba’t ibang international film festivals, kasama na ang Fantasporto sa Portugal, Oslo Film From the South Festival, at sa sarili nating Cinemanila International Festival. Naging nominado rin ito sa Palme d’Or, ang highest prize award sa prestihiyosong Cannes Film Festival.
Ayon nga kay direk Perez, pinanood niya ang dalawang Korean versions. Tiniyak niya na ang ginawa nilang The Housemaid ay nasa kontekstong Pinoy.
Ito ang unang pagkakataon na pinakabida si Kylie sa pelikula. Tinanggap niya ito dahil naging curious siya sa karakter ni Daisy at challenging sa kanya na makasama ang mga batiking artista.
Aniya, pinag-usapan nila ni direk Roman ang limitasyon na pwede niyang ibigay sa pelikula, at buo ang tiwala niya sa estilo ng pagdidirehe ni Perez na umani ng papuri sa kanyang erotic thriller film na Adan.
Mapapanood ang The Housemaid sa Setyembre 10, 2021 sa Vivamax, KTX, iWant TFC, at TFC IPTV.
