Drug ops nauwi sa enkuwentro tulak dedo sa parak (Sa Nueva Ecija)

WALA nang buhay nang bumulagta sanhi ng mga tama ng bala ng baril sa katawan ang isang hinihinalang tulak ng ilegal na droga na nakipagsabayan ng putok nang maamoy na mga pulis ang nakatransaksiyon sa ikinasang drug bust ng Gapan City Police SDEU sa bahay ng suspek sa Brgy. Pambuan, lungsod ng Gapan, lalawigan ng Nueva Ecija, nitong Lunes, 19 Hulyo.

Kinilala ni PRO3 Director P/BGen. Valeriano De Leon ang suspek, batay sa ulat ni P/Col. Jaime Santos, provincial director ng Nueva Ecija PNP, na si Manny Ramos, nasa hustong gulang, nakatira sa nabangit na lugar.

Narekober ng Scene of the Crime Office (SOCO) operatives sa pinangyarihan ng insidente ang isang kalibre .38, mga basyo ng bala, 21 pakete na naglalaman ng hinihinalang shabu, tinatayang nagkakahalaga ng P21,000, at marked money na ginamit sa operasyon.

“PNP-PRO3 is continuously conducting proactive operations to invigorate its efforts to wipe out all forms of illegal drugs in order to achieve its quest for a drug free Central Luzon,” pahayag ni P/BGen. De Leon. (RAUL SUSCANO)