HATAW! D'yaryo ng Bayan hatawtabloid.com
ARESTADO ang tatlong suspek kabilang ang dalawang senior citizens na pinaniniwalaang mga bangag sa ipinagbabawal na droga nang makuhaan ng limang sachet ng hinihinalang shabu at maaktohan sa pot session sa isinagawang anti-narcotics operation noong Miyerkyoles, 14 Hulyo, ng mga operatiba ng Guagua PNP SDEU, sa kanilang hideout sa Brgy. San Rafael, bayan ng Guagua, lalawigan ng Pampanga.
Kinilala ni P/Col. Arnold Thomas Ibay, provincial director ng Pampanga PPO, ang mga suspek na sina Felino Macalino, 61 anyos, biyudo; Amado Magtoto, 61 anyos, may asawa; at Ricardo Sammy Diator, 51 anyos, may asawa, pawang mga residente sa nabanggit na barangay.
Nakompiska ng mga awtoridad mula sa mga suspek ang limang pakete na naglalaman ng hinihinalang shabu, improvised tooter, iba’t ibang drug paraphernalia, at marked money.
Nakatakdang sampahan ng kasong paglabag sa mga probisyon ng RA 9165 o Comprehensive Dangerous Drugs Act of 2002 ang mga suspek na kasalukuyang nakapiit sa detention cell ng Pampanga PNP. (RAUL SUSCANO)
