2 Nigerian national, 4 pa arestado sa bato at damo (Drug den sinalakay sa Pampanga)

Arestado ang dalawang Nigerian national kasama ang apat pang kakontsabang suspek makaraang mahulihan ng hinihinalang shabu at high grade marijuana (Kush) nang salakayin ng PDEA Pampanga ang minamantinang drug den ng mga suspek noong Huwebes ng gabi, 17 Hunyo, sa Villa Teodora, Brgy. Dau, lungsod ng Mabalacat, lalawigan ng Pampanga.

Kinilala ni PDEA3 Director Christian Frivaldo ang mga suspek na sina Anaelechi Kingsly, 37 anyos, binata, ng Brgy. Dau, Mabalacat City; Nelson Ocafor, Jr., 25 anyos, may asawa, ng Brgy. San Rafael, Tarlac City, parehong Nigerian National; April Wright, 25 anyos; Eric Desuyo, 29 anyos; Norwin Carpio, 20 anyos; at Ralph Joseph Yalung, 25 anyos, pawang mga residente sa Mabalacat City.

Nakompiska ng mga operatiba mula sa mga arestadong suspek ang 30 gramo ng hinihinalang shabu na nagkakahalaga ng P204,000; 30 gramo ng pinatuyong dahon ng marijuana na nagkakahalaga ng P3,600; at dalawang gramo ng high grade marijuana (Kush) na nagkakahalaga ng P2,000; marked money; at iba’t ibang drug paraphernalia.

Nahaharap sa kasong paglabag sa Section 5 at 11 ng RA 9165 o Comprehensive Dangerous Drugs Act of 2002 ang mga suspek na nasa kustodiya ngayon ng raiding team. (RAUL SUSCANO)