HATAW! D'yaryo ng Bayan hatawtabloid.com
KITANG-KITA KO
ni Danny Vibas
KASALUKUYANG gumagawa ng record ang latest released film ni Direk Darryl—Ang Babaeng Walang Pakiramdam na nagsimula ang streaming sa ktx.ph, iWantTFC, at VivaMax noong June 11 pero ang kita ay maihahalintulad sa mga hit na pelikula sa mga sinehan bago magkapandemya.
Masayang-masaya sina Kim Molina at Jerald Napoles sa balitang ‘yon na natanggap mula sa Viva.
Reaksiyon nina Kim at Jerald sa tagumpay ng kanilang pelikula. ”Nakatataba po ng puso na sobrang marami pa rin ang sumusuporta sa pelikula namin kahit hindi pa bukas ang mga sinehan dahil sa pandemic.
“Masaya rin po kami ni Jerald na mas marami na ang nakaiintindi sa mensahe ng ‘Ang Babaeng Walang Pakiramdam,’ kahit binatikos ito noong una dahil sa trailer.”
Nakatikim ng mga batikos ang pelikula dahil ngongo ang karakter na ginampanan ni Jerald.
Pero nagbago ang pakiramdam niya sa nababasang positive reviews na nabigla dahil hindi nila inaasahang paiiyakin sila sa ending.
Isa si Dimples Romana sa nagkuwento kay Kim na umiyak siya nang panoorin ang pelikula.
Sabi ni Dimples, ”Just finished watching. 2,000,000 units of emotions for the train scene.”
Ang ibig sabihin ng “unit” sa acting ay ‘yung maliliit na emosyon na mabilis at subtle na naipakikita o naipararamdam ng isang aktor sa isang eksena. Papalit-palit ang mga emosyon na ‘yon na naipararamdam ng aktor sa pamamagitan ng boses o ng pagbigkas ng mga salita o sa iba’t ibang bahagi ng katawan ng artista.
Patuloy ni Dimples, ”Found myself weeping with you and you brought me back to a time when I felt most alive. Overwhelmed with feelings and your eyes spoke of gratitude that you were feeling pain and joy and love all at the same time.
“I mean serious question, is there anything you and JE cannot do?”
Pahayag naman ng isang entertainment website reporter: ”Sa aming palagay, itong ‘Ang Babaeng Walang Pakiramdam’ ang pinakamaganda sa lahat ng mga pelikulang isinulat at ginawa ng direktor na si Darryl Yap.”
At dahil sa kontrobersiyal na character ni Jerald, ginagamit na ito sa mga TikTok video, lalo ang Pinoy Henyo scene nila ni Kim at popular search sa Facebook ang ”Jerald Napoles ngongo.”
