HATAW! D'yaryo ng Bayan hatawtabloid.com
HINDI inakala ng suspek na ang kanyang dating suki sa pagbebenta ng ‘damo’ ang maghuhudas sa kanya kaya huli na nang malamang bitag ang pinasok na kanyang ikinaaresto at nakuhaan ng P1.1-milyong halaga ng hinihinalang pinatuyong dahon ng marijuana sa ikinasang anti-narcotics operation ng Minalin Police Station sa pamumuno ni P/Capt. Mark Anjo Ubaub bilang lead unit, kaantabay ang PDEU-PIU Pampanga PPO, nitong Martes, 1 Hunyo, sa pinaigting na kampanya kontra droga ng PRO3 sa Brgy. Sta Rita, bayan ng Minalin, lalawigan ng Pampanga.
Kinilala ni PRO3 Director P/BGen. Valeriano De Leon ang suspek, base sa report ni P/Col. Arnold Thomas Ibay, provincial director ng Pampanga PPO, na si Ronald Lumaueg, 35 anyos, walang trabaho, may asawa, residente sa Camp 7, sa lungsod ng Baguio.
Nakompiska ng mga awtoridad mula sa suspek ang 11 nakabastang hugis upo at dalawang resealable plastic bag na naglalaman ng hinihinalang pinatuyong dahon ng Marijuana na may timbang na walong kilo at nagkakahalaga ng P1,000,000, isang Toyota Fortuner may plakang ZAP 619, at marked money na ipinain sa suspek.
Nakatakdang sampahan ng kasong paglabag sa probisyon ng Section 5 at 11 ng RA 9165 o Comprehensive Dangerous Drugs Act of 2002 ang suspek na nasa kustodiya ng Minalin PNP. (RAUL SUSCANO)
