HATAW! D'yaryo ng Bayan hatawtabloid.com
ARESTADO ang isang rider nang mahulihan ng baril at mga bala makaraang masita sa isang quarantine control checkpoint na minamandohan ng mga operatiba ng City Mobile Force Company (CMFC) sa pamumuno ni P/Lt. Col. Karen Clark nitong Lunes, 17 Mayo sa kahabaan ng Sto. Rosario St., Brgy. Sto Rosario, sa lungsod ng Angeles, lalawigan ng Pampanga.
Kinilala ni P/Col. Rommel Batangan, City Director ng Angeles City PO, ang suspek na si Ryan Leonel Pamintuan, nasa hustong gulang, may asawa, residente ng Brgy. Amsic, sa naturang lungsod.
Base sa ulat ni P/Lt. Col. Clark, hiningan ng papeles ang sinakyang motorsiklo ng suspek nang sitahin siya sa kanilang checkpoint.
Tumambad sa kanilang presensiya ang dalang kalibre .45 Chromed Commander Firestone baril, may magasin at walong mga bala, nang buksan ng suspek ang compartment ng motorsiklo.
Dinakip ng mga awtoridad si Pamintuan nang walang maipakitang mga legal na dokumento sa pagdadala ng baril at dinala sa Police Station 1, Angeles City Police Office (ACPO) para maimbestigahan.
Nakatakdang sampahan ng kasong paglabag sa RA 10591 ang suspek na kasalukuyang nasa kustodiya ng nabanggit na estasyon ng pulis.
“We have been continuously beefing up our aggressive drive to recover and to seize loose firearms. May this serve as a stern warning to all especially who have not yet renewed their licenses or turned over their undocumented firearms in their nearest police station for safekeeping. Stricter penalties are imposed against violators,” pahayag ni P/BGen. De Leon. (RAUL SUSCANO)
