Suspek sa pinaslang na Japanese treasure hunter timbog sa Nueva Ecija

ITINURO ng mga saksi ang nadakip na suspek sa pagpatay sa isang treasure hunter na Japanese national, ng mga kagawad ng Cuyapo Municipal Police Station nitong nakaraang Miyer­koles, 5 Mayo, sa ikinasang follow-up operation sa Brgy. Baloy, bayan ng Cuyapo, lalawigan ng Nueva Ecija.

Kinilala ni PRO3 Director P/BGen. Valeriano De Leon, batay sa ulat ni P/Col. Jaime Santos, ang suspek na si Villamar Ronquillo, alyas Amar, 40 anyos, binata, kasama ng biktima sa iisang bahay, sa Brgy. Columbitin, sa nabanggit na bayan.

Gayondin, kinilala ang biktima na si Norio Kurumatsuka, 82 anyos, Japanese national, isang treasure hunter, nanu­nuluyan sa bahay ng kapatid na babae ng suspek, sa nabanggit na lugar.

Ayon kay P/Lt. Silvestre Colanza, deputy chief of police at team leader ng Task Force Tugis na agad nagres­ponde nang maiulat sa kanilang himpilan noong 4 Mayo ang insidente, nadat­nang nakabulagta at wala nang buhay na biktima, may mga sugat at pasa sa ulo at kamay sa isang bakanteng lote malapit sa tinutuluyan niyang bahay sa lugar.

Base sa mga nakalap na mga impormasyon at testimonya ng mga saksi, agad sinalakay ng mga awtoridad ang hideout na pinagtataguan ng suspek sa Brgy. Baloy, hindi kalayuan sa pinang­yarihan ng insidente na nagresulta sa kanyang pagkadakip.

Batay sa imbesti­gasyon, hindi mag­kasundo ang suspek at ang biktima bagaman magkasama sa iisang bubong, at palagi umanong nag-aaway hanggang magkaroon ng mainitang pagtatalo na nauwi sa pamamaslang ng suspek sa matandang Hapones.

Isinailalim sa awtop­siya ang bangkay ni Kurumatsuka upang malaman ang tunay na sanhi ng kanyang pag­kamatay.

Samantala, nahaha­rap sa kasong murder ang suspek na kasalukuyang nakapiit sa custodial facility ng PNP Cuyapo.

(RAUL SUSCANO)