Zaijian pasok sa American crime drama series

PASOK na rin si Zaijian Jaranilla sa American crime drama series na Almost Paradise at mapapanood siya ngayong Linggo, Mayo 9, 8:45 p.m. sa Kapamilya Channel at A2Z at may streaming sa iWantTFC at Kapamilya Online Live sa Facebook at YouTube para sa mga nasa Pilipinas.

Sa inilabas na teaser sa social media, makikita ang young star kasama ang beteranong aktor na si Art Acuña, na gumaganap bilang Detective Ernesto Alamares sa programang handog ng Electric Entertainment at ABS-CBN.

Sa episode na ito, magsisilbing bodyguard ang dating secret agent na si Alex Walker (Christian Kane) para sa tanyag na country singer na si August Crowe na naroon sa Cebu para sa isang concert. Mula pagiging fan, unti-unting nauubos ang respeto ni Alex sa idolo nang makita kung paano ito sa pribado niyang buhay. Gayunman, ang banta mula sa mga matinik na kidnapper ang magiging dahilan para maging malapit sila sa isa’t isa.

Gaganap bilang August ang aktor na si Billy Ray Gallion,  na napanood sa mga palabas na Brooklyn Nine-Nine at Lost sa Amerika at nakaarte na kasama ng mga Filipino sa Quezon’s Game at Ang Babae Sa Septic Tank 3.

Daragdag pa sa Pinoy power sa ikawalong episode maliban kay Zaijian ang premyadong aktor na si Elijah Canlas at si Al Gatmaitan. Filipino rin ang direktor ng episode na si Irene Villamor, na nasa likod ng mga pelikulang On Vodka, Beers, and Regrets, Meet Me in St. Gallen, at  Sid & Aya: Not A Love Story.

FACT SHEET
ni Reggee Bonoan