HATAW! D'yaryo ng Bayan hatawtabloid.com
MISTULANG aso’t pusang maghaharap ngunit mauuwi sa pag-iibigan sina Belle Mariano at Donny Pangilinan sa pinakahihintay na serye ng ABS-CBN Entertainment, iWantTFC, at Star Cinema na He’s Into Her, na magsisimula sa Mayo 30 sa A2Z at Kapamilya Channel.
Hango sa kilalang Precious Pages-LIB na nobela na isinulat ng sikat na Pinoy author na si Maxinejiji, ipinakikita ng He’s Into Her series kung paano ipaglaban ng buong tapang ang pamilya, kaibigan, at pag-ibig.
Ito ang kuwento ng probinsyanang si Maxpein (Belle), na papayag sa pakiusap ng ama na tumira kasama niya sa Manila, bilang pagtanaw ng utang ng loob dahil tinulungan nitong ipagamot ang lola.
Lakas-loob na haharapin ni Maxpein ang bagong buhay sa siyudad, kasama ang pag-aaral sa Benison International School. Susubukan ng baguhang estudyante na makibagay ngunit dahil sa kanyang malakas na dating, makahahanap ito ng katapat sa pagkatao ni Mr. Popular na si Deib Lohr (Donny). Dahil dito, ang tahimik niyang buhay ay biglang gugulo.
Makakasama nina Belle at Donny sa He’s into Her ang ilan pang rising stars ngayon tulad nina Jeremiah Lisbo, Vivoree Esclito, Kaori Oinuma, Rhys Eugenio, Joao Constancia, Criza Taa, Ashley del Mundo, Gello Marquez, at iba pa. Mula sa direksiyon ng bago at batang director na si Chad Vidanes.
FACT SHEET
ni Reggee Bonoan
