HATAW! D'yaryo ng Bayan hatawtabloid.com
ARESTADO ang nagsabwatang manager at caretaker upang ransakin ang JJ Rock Poultry farm matapos silang inguso ng dalawa nilang kasamahan na nauna nang natiklo nang matiyempohan ng Talavera Municipal Police Station patrollers nitong Lunes ng madaling araw, 22 Marso, sa Brgy. Sampaloc, bayan ng Talavera, lalawigan ng Nueva Ecija.
Kinilala ni P/Col. Jaime Santos, provincial director ng Nueva Ecija PPO, ang mga suspek ayon sa ulat ni P/Lt. Col. Heryl Bruno, hepe ng Talavera PNP, na sina alyas Ray, 22 anyos, farm manager, residente sa San Mariano Maugat, sa bayan ng Peñaranda; alyas Jerry, 38 anyos, farm caretaker; alyas Joseph, 32 anyos; at alyas Jomel, 29 anyos, kapwa residente ng Jaen, sa nasabing lalawigan.
Ayon sa imbestigasyon ng mga awtoridad, dakong 1:00 am kamakalawa nang ransakin ng mga suspek ang poultry farm.
Natiyempohan ng police patrollers ng Talavera PCP 2 na sina P/SSgt. Melvin Sagcal at P/Cpl. Jaypee Acierto, kasama ang mga tanod, ang mga suspek na sina alyas Joseph at Jomel sa daan na marurungis at puno ng putik ang katawan habang kinakarga ang apat na sako ng poultry feeds sa nakaparadang kolong-kolong at nang sitahin ay pinaarangkada patakas ang dalang motorsiklo patungong by-pass road.
Sa kanilang pagkakahuli, inginuso ang farm manager at caretaker na siyang mastermind sa pagnanakaw at tumatayong lookout sa loob ng naturang farm.
Nahaharap sa kasong qualified theft sina alyas Ray at alyas Jerry, samantala kasong theft ang isasampa laban kina alyas Joseph at Jomel.
(RAUL SUSCANO)
