4-anyos anak ng kinakasama binugbog Koreanong amain timbog

Arestado ang isang Korean national sa ginawang pisikal na pananakit sa 4-anyos batang babae anak ng kanyang live-in partner nitong Biyernes, 26 Pebrero, sa lungsod ng Angeles, lalawigan ng Pampanga.

Ayon kay PRO3 Director P/BGen. Valeriano De Leon, pino­sasan ng mga nagres­pondeng kawani ng ACPO Police Station 2 ang suspek na kinilalang si Hun Kim, 41 anyos, Korean national, naninira­han sa 1926 Camia St., Timog Subdivision, Pampanga, ng nasabing lungsod, upang imbesti­gahan ang kaugnay na reklamo laban sa kanya.

Sa salaysay ni Lady Jane Delara, 27 anyos, live-in partner ng suspek, residente rin ng nasabing lugar, na habang minamaneho ni Kim ang kanilang Toyota Fortuner at nasa ilalim ng impluwensiya ng alak, pinagpapalo at pinagsusuntok umano ang kanyang apat na taong gulang na anak na babae sa hindi malamang kadahilanan.

Sa impormasyong nakalap ng mga awtoridad, hindi ito ang unang pagkakataong makaranas ng pananakit ang kanyang anak mula sa kinakasama at katuna­yan ay ipina-blotter na nila ang suspek sa nasabing himpilan ng pulisya, ngunit hindi tinuloy noon ang pagdemanda sa suspek.

(RAUL SUSCANO)